شاليط الضفة؟

يكون مايكون في حديث مآسي هالكون,والكل قاعد ع التلفزيون وبإيده الغليون ,مرة بقلب المحطات, إما

كورة إما مسلسلات,ومرة بسرح وبعد بالمصريات ياترى بربح وبيشتري لابتوب وسيارة وبفرح ؟وللا بخسر وبترح؟! ... خلصت حكايته اكل وشرب ونوم ونت وتلفزيون هيك حالته وإذا بالغلط اجا زر الرموت, ع رقم قناة الأخبار أجاك الموت ياريموت وللا نكش الحج جوجل راسه وعمله قلاية أخبار مع شوية لحم بني وطنه وع النار حاسه وبس طلعتله القلاية شاف ألفين من الفلسطينيين عضم بدون لحم محطوطين بالزنازين وأكمن واحد معدودين برا السجن متضامنين وشوية فرقعات وأغاني محطوطين ,صح انه المحروس لاهي بس لسا شوية احساس بالوجه باهي ,لهيك صرخ وقال حج جوجل ايش هالمقال؟!قله الحج ,خذلك هاليوتيوب ولا تطج بس ياحزركم ايش هاليوتيوب؟ ناس بتوكل خروب؟ وللا ناس بتشوي بالزروب؟؟... فتح الرابط هالشب, وشاف ألفين اسير بالزنازين بيقووووولوا لا لسياسة الكيان الصهيوني لا للعزل الانفرادي لا لمنع الزيارات ولا للاعتقال الاداري ولا .. ولا ... ولا وكثير من اللاءات ... قرر هالمسكين ,يحرر هالأسرى وما يستكين ,راح يدور ويلطش ويسأل ويستفسر ؛حتى عرف انه شاليط حرر اكثر من الف اسير واسيرة , فقرر يروح المحروس , اما ع الضفة او غزة ويتخبى بين هالروس ففكر وقال شاليط الاول من غزة خلي شلاليط الثانيين من هالضفة وراح هالضفة وما لبس التروس

زبط أموره وكله تمام وقرر يخطف شاليط هالهمام همة ونشاط وارادة اجا عنا هالمقدام , وصل!شو قلتي؟ بقوول وصل ... شهر شهرين يدرس بالمغتصبات "المستوطنات" ,ومتى بتيجي هالدوريات بيوم قال خليني اتنزه , وهيك ما حد بشك فيي وخليني شوي أتزهزه ,قام المسكين ركب بهالباص وقال يامعين انصرنا على القوم الكافرين وبلشت المعركة وقنابل وزخ رصاص وأسر هالجندي وحمله وطار فيه واختفى! بس وين هالمعركة ياكرام صارت وهو غافي ع الكرسي ياكرام ,بس شو يلي صار؟ فجأة خبط راسه بالكرسي ووقف الباص وصحي من المنام يفكر انه اسر شاليط ياحرام وفتح عيونه لقى جنب الكرسي شاليط بيقول طلاسم بالعربي مكسرة بالعبري وهو صافن وبقول ويش وها, ويافرحة امه الحزين عقله كيف بدو يوخذ هالشاليط ,وبمساعدة يلي قاعد بجنبه صحاه من حلمه, وقله بقولك هات الهوية, أعطاه الهوية مع أكمن قطعة جاج مشوية وحق هالقطعة المشوية أخذ شلوط برا الباص جابته بنص الدورية ,يا مسكين الكلاب جوعانة وبتقلك جيبهم مع اكمن رمانة هالجنود يتخرفوا ويحكوا مع المحروس وهو سارح وبيعد شاليط شاليطين ثلاثة .. ستة !!!! بس هدول بالدورية يتلمس حاوليه ويدورفي الجب جنب الشارع فوقه تحته ايه ما في! ست جنود حاجز عاملين , ومية باص وسيارة صافين وقول مية سيارة ضرب أربع بني آدمين بيجو أربع مية واقفين لو هجموا ع الستة الملعونين كان حررنا ست آلاف من الاسيرين وبعملوا حملة اعتقالات بصيروا يلي بالسجون سبع آلاف وبنرفع سعر التبادل مقابل شاليط واحد الف وأكمن واحد باقين هيك بنحرر الكل ومابضل غير السجّانين ... الله!!! شلوم معكم السلطة الوطنية الفلسطينية احنا بعاد عندكم مترين لا تقلقوا الوضع تمام وانتوا بأعيننا محروسين اذا فكر واحد يخطفكم بنلقطه وبالتعذيب بنموته واذا لا سمع الله خطفكم بعيد الشر عنكم الله يخليكم لأهلكم بنرجعكم كونوا متطمنين وع أقل من مهلكم فتشوه وكل ارهابي عذبوه وورا الشمس اسجنوه أو احكيلكم اعدموه !, والمسكين يلي بحلم بشاليط أنجلط ,ومن هالحال انخبط, وبسيارة الاسعاف زتوه وقال هسا عرفت ليش الضفاوية ساكتين وأنا يلي كنت مفكرهم جبانين طلعوا رجال ,ولاد رام الله والقدس ونابلس جبل النار وجنين ... لا تظلموهم هالأشاوس وجهاز تخطيط القلب طووووط طوووووووط مااات؟!!!! خلصت

الحكاية ويا رب بكرا يتغير هالحال ويطلعوا الرجال